موضوع للمناقشة ... أفضل طريقة لتنظيف البوردة

[sadfriend]

الأخوة الأفاضل أعضاء المنتدى ....

انا بكتب الموضوع ده عشان نتناقش مع بعض وكل واحد يحط خبرته ونتكلم ...


طبعاً لا يخفى عليكم ... أنه كثيراً جداً يكون عدم نظافة البوردة والتراب عليها واحيا معاه اسبراى ورطوبة وحاجات كدة ... لدرجة انه ممكن تكون ولا مؤخذة ( مطينة ) ، وكتير بتكون النظافة للبوردة هو الحل فى لمشاكل كتير زى انها بتعمل رستارت ... او ننظف سلوت الرامات او agp أو pci وهكذا

بس يا تراى ايه هى أفضل طريقة لتنظيف البوردة بدون ان تتلف مكوناتها ...

فى كتيير مننا بيستخدم فى التنظيف بنزين او تنر أو اسبراى وحاجات كتيرة ... بس انا كنت بفكر فى نوع تانى من التنظيف ... فكرة خطرت فى بالى بس مش عارف دى صحتها أو تتنفذ إزاى ... إخوانا الى بيصلحوا الموبيلات بيقوموا بتنظيف بوردة الموبايل داخل غسالة ... وهى جهاز شبه الغسالة بتملا بنزين أو تنر و بيتحط فيه البوردة وبيصدر عدة إهتزازات والبوردة بعد شوية بتطلع زى الفل .. كانها جديدة ... انا كنت بفكر اعمل كدة فى الماذر بورد وبورد الهاردات والسيدى روم ... بس أنا مش عارف هل ليها تأسير سلبى ولا ايه خاصة إنى شاكك ان ممكن تحصل مشاكل مع المكثفات الى موجودة فى البوردة او مع بعض القطع ... لكن أعتقد أنه لا بأس بها مع بورد الهاردات

يا ريت كل الى عنده فكرة لتطوير الموضوع أو يعطينا خبرته فى المجال ده ميترددش انه يرد ونتناقش سويا

[محمد البدوي]

يا باشا نظف بالاسبراي الاكاي الازرق احسن لك عن طريق وضع رشة اسبراي في قطن طبي ولا منديل ونضف ولا تكثر من الاسبراي وتطلع معاك البوردة نظيفة
النضافة مطلوبة بهدف ان البوردة يكون مظهرها معقول وبحيث لا يسبب الاتساخ عطل
النضافة ليست هدف في حد ذاته واللي يهم هو تصليح البوردة مش تنضيفها

وبالمنطق لو جينا نفرض بان الجهاز اللي بيستعملوه في التنضيف ده بيغرق البوردة تنر
عارف ايه اللي هيحصل لو كلامك صح
هتلاقي التنر اكل او خلص علي ما هو بلاستيكي في البوردة فالتنر مدمر لما هو بلاستيكي فهو يخفيه من الوجود اصلا

واسال مجرب والحمد الله عملتها في بوردتي من ايام البنتيوم 3لغاية لما عرفت ان التنر هو اللي بيعمل كده

وانا انصحك دايما لما تستخدم فلكس لا تكثر منه لانه عازل للتوصيلات

يارب اكون افدتك

[en.mohamedsaid]

اخى الكريم بالنسبة لموضوع المغسلة فهذه المغسلة يصدر عنها عده اهتزازات مما تسبب ارتفاع بسيط فى سخونية البنزين لتساعد على النظافة وهذا لا يصح عمله فى الماذر بورد لان هذا سيقوم بتدمير البلاستيك الموجود على الماذر بورد هذه المغسلة لا تصلح الا للرامات فقط
اما بالنسبة للتنظيف فبالاسبراى كما اشار الاخ المغامر مع فرشاه

[م/محمود ادريس]

مابنستخدمش التنر نهائي. لأنه بيتلف البلاستيك في السوكتات
انا عن نفسي باستخدم النفط... عملي جدآ. ورخيص الثمن

[sadfriend]

شكراً على الردود وده عشمى فيكم دايماً ... وانا عارف طبعاً ان التنر بياكل البلاستيك ده حتى البنزين بيعمل كدة ... انا بس الفكرة جتنى وحبيت طرحها ... أنا عن نفسى بستخدم السبراى بس انا قلت لو حد يعرف سائل تنظيف تانى ممكن نستخدمه وبعدين احيانا بيبقى فى اماكن ضديقة وصعب تنظيفها بالفرشة انا قلت لو ادينها عسلة تمام كدة زى ما بتوع الموبيلات بيعملوا يبقى تمام اهو ندى نتيجة جداً فعالة وفى نفس الوقت توفير للوقت وكفائة أعلى

[TARIQ_ALKDR]

يا جماعة انا استخدم التنر من زمان ومفيش مشاكل بس انا اعمل حاجة

احط بقنينة ثلث تنر وثلثين نفط ( الخلطة السحرية ) وكلو تمام


وما اعاني من اي مشاكل مع البلاستيك

[justayman]

أخي الكريم أغسل البوردة بالماء ودعها لتجف تماما وهذه طريقة مجربة

[محمد البدوي]

احذرك عزيزي من وضع الماء علي البوردة ولو نقطة ول حتي علي قطنة تمسح به فاقل ما يقال عنه انه مدمر للتوصيلات
وكلكم عارفين ان البورد في مصر توصيلاتها نحاسية والذهب فيها قليل جدا ان ما كان منعدم فهي لا تتحمل هذه الاخطاء

[rashisy1]

احب ااقول ان من اخطر الاشياء في التنظيف هو الاكاي حيث حدث معي هذا المشكل اكثر من مره اثناء التنظيف وخاصة للماذر حيث كنت ارش الاسبراي على البورده ثم اقوم بالتنظيف بالفرشاه وبعد تنظيف البرده وكله تمام الاحظ انها قطعت داتا من يومها وانا استخدم التنر في التنظيف وكله تمام . واريد من سيادتكم تاكيدا لكلامب ملاحظة البرده بعد رش الاكاي وتركه يجف ستلاحظ ان الوصلات واللحامات اصبح عليها طبقة جيرية

[sadfriend]

أخي الكريم أغسل البوردة بالماء ودعها لتجف تماما وهذه طريقة مجربة


لا يا غالى ... معروف جداً إن إستخدام الماء مع هذه المكونات الكيميائية غلط جداً ... لانك وبلا شك بتعرضها للرطوبة .... أثناء جفاف البوردة ... كمان ان عارف ان فى بعض الأحيان بيبقى أسفل الشيب أو الأيسى فارغ وممكن تتخزن ماء تحتهم ومتعرفش تجففها كويس وتكون عرضه للرطوبة وتبف الشيب

[sadfriend]

احب ااقول ان من اخطر الاشياء في التنظيف هو الاكاي حيث حدث معي هذا المشكل اكثر من مره اثناء التنظيف وخاصة للماذر حيث كنت ارش الاسبراي على البورده ثم اقوم بالتنظيف بالفرشاه وبعد تنظيف البرده وكله تمام الاحظ انها قطعت داتا من يومها وانا استخدم التنر في التنظيف وكله تمام . واريد من سيادتكم تاكيدا لكلامب ملاحظة البرده بعد رش الاكاي وتركه يجف ستلاحظ ان الوصلات واللحامات اصبح عليها طبقة جيرية


هى بتحصل معايا وعشان كدة أنا فكرت فى أستخدام شىء أخر ولو أنهم قالولى إستخدم الأكاى الأحمر ... وبلاش الأزرق لانه بيعمل كدة

[jojo sniper]

بسم الله الموفق
**********************
اولا : كل سنة وانتم طيبين ورمضان كريم
ثانيا: انا من وجهة نظري استخدام البلاور بعد ان تفوت ساعة بعد اطفاء الجهاز ان كان شغال لكن لو مطفي عادي
http://www.global-b2b-network.com/direct/dbimage/50179550/Blower.jpg
ثالثا:البنزين النقي او التنر وانا افضل التنر النظيف
وشكراااااااااااااااااااااااااااااااااااااااااااااا اااا

[محمد البدوي]

رش الاكاي علي البوردة بعدين تستعمل الفرشة هو غلط لا شك

لكن اللي انا اقصده هو ان تبل القطنة به وتنظف ولن ياذي البوردة

اما التنر هو تمام لكن اي خطا النتائج علي البلاستيك معروفة جدا

موضوع ترك الجهاز ساعة والشغلانة دية باه حوار فاشل جدا لانه بببساطة عطله للوقت فضلا عن انه موضوع ليس له اي سند علمي
يعني انا اؤيد انك تسيب الجهاز لغاية لما يهدا حوالي خمس عشر دقايق بالكتير وتبتدب شغلك

[mohammedhagag]

أنا عن نفسى بأستخدم البلاور لنفخ أى أتربة على البوردة وخصوصا فى السلوتات والأماكن الضيقة ثم بعد ذلك بفرشاة ناعمة أقوم بالتنظيف مرة أخرى لتظيف التراب الناعم الملتصق
ثم بعد ذلك أستخدم الأكاى الأزرق وليس الأحمر لأن الأزرق هو المخصوص بالصيانة أما الأحمر فعلية زيت ولذا يستخدم فى الأجزاء الميكانيكية
المهم أن الأكاى يرش فى أماكن السلوتات وفى بنك الرامات وقاعدة البروسيسور لو كانت بى جى أية
وبس تلاقى البوردة زى الفل وشغالة تمام بس مع ملاحظة تتركها شوية بعد الرش وتركب تلاقيها زى الفل
أخوكم د/محمد حجاج

[م/محمود ادريس]

أخي الكريم أغسل البوردة بالماء ودعها لتجف تماما وهذه طريقة مجربة
مية أيه يا عم ... انت جيت تكحلها عميتها...

مع الإعتذار لكل الساده الأعضاء. ياريت الإفاده بالصح. مش كده
يا أخ JUSTYMSN